👉 చీఫ్ జస్టిస్ ధర్మాసనం ముందు.!
J.SURENDER KUMAR,
దేశ సర్వోన్నత న్యాయస్థానంలో ఓ అరుదైన సన్నివేశం సోమవారం జరిగింది. దివ్యాంగురాలు (మూగ, చెవిటి) అయిన ఓ మహిళా న్యాయవాది సైగలతో తన వాదనలు సుప్రీంకోర్టు ప్రధాన న్యాయమూర్తి, డీవై చంద్రచూడ్ నేతృత్వంలోని ధర్మాసనం ముందు వినిపించారు. ఇలా సైన్ లాంగ్వేజ్ (సైగలతో కూడిన భాష) లో కేసును వాదించడం దేశంలో ఇదే మొదటిసారి.
తొలిసారిగా సంజ్ఞలతో వాదనలు!
దివ్యాంగులకు సంబంధించి ఓ కేసు విషయంలో వర్చువల్గా విచారణ చేపట్టేందుకు అనుమతి ఇవ్వాలంటూ జస్టిస్ డీవై చంద్రచూడ్ నేతృత్వంలోని రాజ్యాంగ ధర్మాసనాన్ని సుప్రీం కోర్టు సీనియర్ న్యాయవాది, సంచితా ఐన్ కోరారు. దీనికి సానుకూలంగా స్పందించిన న్యాయస్థానం సైన్ లాంగ్వేజ్లో, సారా సన్నీ వాదనలు వినేందుకు అంగీకరించింది. అనంతరం ఈ విచారణలో వాదోపవాదనలు సారా సన్నీకి, అర్థమయ్యేలా సైన్ లాంగ్వేజ్ నిపుణుడు, సౌరభ్ రాయ్ చౌదరికి కూడా అనుమతి ఇవ్వాలంటూ కోర్టును కోరారు. అయితే ఇందుకు సుప్రీంకోర్టు కంట్రోల్ రూమ్ తొలుత అభ్యంతరం వ్యక్తం చేసింది. దీంతో ఈ విషయాన్ని సంచితా ఐన్. ప్రధాన న్యాయమూర్తి దృష్టికి తీసుకువెళ్లారు. అనంతరం ‘ఫర్వాలేదు.. ఆయన కూడా స్క్రీన్లో జాయిన్ కావచ్చు’ అంటూ సీజేఐ వెంటనే ఆమెదం తెలిపారు. దీంతో ఈ కేసు విచారణ వివరాలను సౌరభ్ రాయ్ సంజ్ఞలతో సారా సన్నీకి వివరించారు. ఆయన సాయంతో సారా సన్నీ, కోర్టులో సైగలతో తొలిసారి వాదనలు వినిపించారు.
ఆసక్తిగా తిలకించారు!
వ్యాఖ్యాత (ఇంటర్ప్రిటర్) సౌరభ్ రాయ్ చౌదరీ సంజ్ఞ భాషలో కేసు వివరాలను దివ్యాంగ న్యాయవాది సారా సన్నీకి, వివరిస్తున్న తీరును కోర్టు రూమ్లోని ప్రతిఒక్కరూ ఆసక్తిగా తిలకించారు. కాగా వీటిని అర్థం చేసుకొని వర్చువల్ విధానంలో వాదనలు వినిపించారు సారా సన్నీ. కాగా, సీజీఐ ముందు ఇంత వేగంగా, అది కూడా సైగల ద్వారా కేసును వాదించడం అద్భుతమని అక్కడే ఉన్న సొలిసిటర్ జనరల్ తుషార్ మెహతా, ఆశ్చర్యానికి గురయ్యారు. సారా సన్నీని మెచ్చుకున్నారు.
సీజేఐకు థ్యాంక్స్!
సారా సన్నీ . సుప్రీంకోర్టు ప్రముఖ సీనియర్ న్యాయవాది సంచితా ఐన్, వద్ద జూనియర్ లాయర్గా విధులు నిర్వర్తిస్తున్నారు. ఈ అవకాశాన్ని కల్పించిన సీజేఐ జస్టిస్ చంద్రచూడ్కు సారా సన్నీ, ప్రత్యేకంగా ధన్యవాదాలు తెలిపారు. ఇక తాను భవిష్యత్తులో వ్యాఖ్యాత సాయంతో వాదనలు వినిపిస్తానని ధీమా వ్యక్తం చేశారు.
ఇదీ కేసు..
భూమిక ట్రస్టు వ్యవస్థాపకుడు, అధ్యక్షుడు జయంత్ సింగ్ రాఘవ్ (చూపు లేదు) సోమవారం పీడబ్ల్యూడీ హక్కుల చట్టం-సెక్షన్ 24లోని నిబంధనను తమకు (దివ్యాంగులకు) అమలు చేయాలని వాదించారు. ఈ చట్టం ప్రకారం.. సామాజిక సంక్షేమ పథకాలు, సహాయం విషయంలో సాధారణ వ్యక్తులకు అందిస్తున్న సాయం కన్నా తమకు (దివ్యాంగులకు) 25 శాతం అధికంగా లబ్ధి అందాలని.. దీనిని అమలు పరిచే విధంగా చొరవ తీసుకోవాలని జయంత్ సింగ్ కోర్టును ఆశ్రయించారు. ఈ వ్యావహారం పైనే దివ్యాంగ న్యాయవాది సారా సన్నీ, సైగల ద్వారా వాదనలు వినిపించారు. ఈ వాదనలు విన్న న్యాయస్థానం.. సంబంధిత కేసుకు సంబంధించిన వివరాలను కోర్టుకు సమర్పించాల్సిందిగా కేంద్రాన్ని కోరింది. కాగా, విచారణను సుప్రీం కోర్టు నాలుగు వారాలకు వాయిదా వేసింది.