జనవరి 13 నుండి ఫిబ్రవరి 26 వరకు యుపిలోని ప్రయాగ్‌రాజ్‌లో జరుగనున్న మహా కుంభమేళా కోసం తిరుమల శ్రీవారి రథం ప్రారంభమైంది.
తిరుమలలో బుధవారం ఉదయం ప్రత్యేక పూజల అనంతరం కల్యాణరథాన్ని టీటీడీ చైర్మన్ బీఆర్‌ నాయుడు, అదనపు ఈవో సిహెచ్‌ వెంకయ్య చౌదరి జెండా ఊపి ప్రారంభించారు.
ఈ సందర్భంగా చైర్మన్ మీడియాతో మాట్లాడుతూ.. మహా కుంభమేళా సందర్భంగా యూపీ ప్రభుత్వం కేటాయించిన 2.8 ఎకరాల స్థలంలో టీటీడీ శ్రీవారి నమూనా ఆలయాన్ని ఏర్పాటు చేసిందన్నారు. టిటిడి 170 మంది సిబ్బందిని నియమించడంతో తిరుమలలో మాదిరిగానే నమూనా ఆలయంలో అన్ని కైంకర్యాలను నిర్వహించనున్నారు.
ముఖ్యంగా ఉత్తరాది నుంచి వచ్చే భక్తులకు శ్రీవేంకటేశ్వర దేవాలయం దివ్య ఆశీస్సులు అందిస్తుందని తెలిపారు.
జనవరి 18, 26, ఫిబ్రవరి 3, 12 తేదీల్లో శ్రీవారి కల్యాణోత్సవాలు నిర్వహించనున్నట్లు టీటీడీ బోర్డు చీఫ్‌ తెలిపారు.
కుంభమేళాకు వెళ్లే ప్రతి ఒక్కరూ సమన్వయంతో పనిచేసి టీటీడీ ఖ్యాతిని ముందుకు తీసుకెళ్లాలని ఆకాంక్షించారు.
కాగా, కల్యాణ రథంలో శ్రీవారు, శ్రీదేవి, భూదేవిల ప్రతిరూప ఉత్సవ మూర్తులను తిరుమల ఆలయ ప్రధాన అర్చకులు శ్రీ వేణుగోపాల దీక్షితులు నేతృత్వంలో ధార్మిక సిబ్బంది నిర్వహించారు.
జేఈవో(హెచ్అండ్ఈ) శ్రీమతి గౌతమి, ఆలయ డీఈవో శ్రీమతి లోకనాథం, హెచ్‌డీపీపీ కార్యదర్శి శ్రీరామ్‌ రఘునాథ్‌ తదితరులు పాల్గొన్నారు.