👉 వర్గీకరణను దేశంలో ఏ రాష్ట్రం కూడా అమలు చేయలేదు !
J.SURENDER KUMAR,
ఎన్నో సమస్యలు ఎదురైనప్పటికీ క్రమ పద్ధతిలో షెడ్యూల్డు కులాల వర్గీకరణ అంశాన్ని ఒక కొలిక్కి తెచ్చామని ముఖ్యమంత్రి ఎ.రేవంత్ రెడ్డి చెప్పారు. ఈ వర్గీకరణ ఎవరికీ వ్యతిరేకం కాదని, వారిలో జగిరిన అన్యాయాన్ని సరిదిద్దే ప్రయత్నమేనని వివరించారు. ఈ వర్గీకరణ ప్రక్రియ భవిష్యత్తులో ఎలాంటి న్యాయపరమైన చిక్కులు ఎదురుకాకుండా శాశ్వత పరిష్కారం చూపించాలన్న ఉద్దేశంతో సుదీర్ఘ కసరత్తు చేశామని అన్నారు.
👉 శాసనసభలో ఎస్సీ వర్గీకరణపై బిల్లును ఆమోదించి చట్టం చేసిన నేపథ్యంలో ఎస్సీ ప్రజా ప్రతినిధులు, ఎస్సీ సంఘాల ప్రతినిధులతో బుధవారం జరిగిన సమావేశంలో ముఖ్యమంత్రి ప్రసంగించారు. భవిష్యత్తులో ఎలాంటి న్యాయపరమైన చిక్కులు ఎదురుకాకుండా వర్గీకరణకు శాశ్వత పరిష్కారం చూపించాలని ప్రయత్నించామని తెలిపారు.
👉 ఎస్సీ వర్గీకరణ కు శాశ్వత పరిష్కార మార్గం కోసం మంత్రి దామోదర్ రాజనర్సింహ నేతృత్వంలో ఎమ్మెల్యేలు అడ్డూరి లక్ష్మణ్ కుమార్, కవ్వం పెళ్లి సత్యనారాయణ, వేముల వీరేశం, శ్యాముల్, ఆ సామాజిక వర్గ ఎమ్మెల్యేలను బృందంగా చేసి వారినే ఢిల్లీకి అనేక పర్యాయాలు పంపించినట్టు సీఎం వివరించారు.
👉 దేశంలో ప్రముఖ న్యాయవాదులు సిద్ధార్థ లూత్రా, అభిషేక్ సంఘీలను ప్రభుత్వ పక్షాన నియమించి సుప్రీంకోర్టులో వర్గీకరణ అంశం వాయిదాలు పడకుండా బలంగా వారు వాదనలు వినిపించారని అన్నారు. సుప్రీంకోర్టులో ఏడుగురు ప్రధాన న్యాయమూర్తుల బెంచ్ కు ఈ అంశం గణాంకాలతో వివరించి బలమైన వాదనలు వినిపించడం ఆషామాషీ అంశం కాదన్నా రు.
👉 “59 కులాలను ఏ రకంగా వర్గీకరించాలి, రోస్టర్ విధానం ఎలా ఖరారు చేయాలన్న విషయాల్లో ఏక సభ్య కమిషన్ చాలా లోతుగా విశ్లేషణలు చేసి ప్రభుత్వానికి 199 పేజీల నివేదిక సమర్పించింది. అందులో వారు ఎస్సీల 15 శాతం రిజర్వేషన్లను మూడు కేటగిరీలుగా వర్గీకరించారు. ఆ ప్రయత్నం చట్టపరంగా, న్యాయపరంగా ఉండాలన్న ఉద్దేశంతో అన్ని చర్యలు తీసుకున్నారు.
👉 ఇప్పుడు కాకపోతే ఇంకెప్పుడు ఎస్సీ వర్గాలకు న్యాయం చేయలేమని భావించి నిర్ణయాలు తీసుకున్నాం. అసెంబ్లీలో బిల్లు ఆమోదం పొందాలంటే దానికొక విధానం ఉంటుంది. రూపొందించించే చట్టంలో లొసుగులు ఉండొద్దు. శాశ్వత పరిష్కారం చూపాలని భావించాం.
👉 వర్గీకరణను దేశంలో ఏ రాష్ట్రం కూడా అమలు చేయలేదు. ముఖ్యంగా మాదిగలు ఎవరికీ అన్యాయం చేయడం లేదు. వారి న్యాయమైన హక్కు కోసం వారు ప్రయత్నం చేస్తున్నారనే ఒక విస్తృతమైన అభిప్రాయం కల్పించడం కోసం ప్రభుత్వం ఈ కసరత్తులో పూర్తిగా ప్రయత్నం చేసింది.
👉 ఈ అంశం కొలిక్కి వచ్చే వరకు కొత్తగా ఒక్క నోటిఫికేషన్ కూడా జారీ చేయలేదు. ఎందుకంటే ముందు ఈ అంశం ఏదో ఒకటి తేల్చాలని, పరిష్కారం చూపాలని పట్టుదలతో పనిచేశాం. ఇంత చేసిన తర్వాత వర్గీకరణ వృధా కావొద్దు. భవిష్యత్తులో పది మందికి ఉపయోగపడాలి. అవకాశం వచ్చినప్పుడు సద్వినియోగం చేసుకోవాలి. మీ సంక్షేమం, అభివృద్ధి కోసం ఈ ప్రభుత్వం పనిచేస్తుంది..” అని ముఖ్యమంత్రి పేర్కొన్నారు.
👉 ఈ సమావేశంలో మంత్రులు దామోదర రాజనర్సింహా , పొన్నం ప్రభాకర్ , పీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ , ప్రభుత్వ విప్ అడ్లూరి లక్ష్మణ్ కుమార్ తో పాటు ఇతర ప్రజాప్రతినిధులు, ఆయా సంఘాల ప్రతినిధులు పాల్గొన్నారు.
👉 కృతజ్ఞతలు !
వర్గీకరణ బిల్లు ఆమోదం పొందిన సందర్భంగా స్పీకర్ గడ్డం ప్రసాద్‌ను కలిసి కృతజ్ఞతలు తెలిపిన ఆరోగ్యశాఖ మంత్రి దామోదర రాజనర్సింహ , ఎమ్మెల్యే ప్రభుత్వ విప్ అడ్లూరి లక్ష్మణ్ కుమార్