👉 బై-నంబర్లు ఇచ్చి సమస్యల పరిష్కారం.!
👉 కోర్టు పరిధిలోని భూములు మినహాయించి చర్యలు !
👉 కూకట్పల్లిలో ఇందిరమ్మ టవర్స్కు శంకుస్థాపన.!
👉 ముఖ్యమంత్రి రేవంత్ రెడ్డి !
J.SURENDER KUMAR,
నిషేధిత జాబితా (22-A)లో తమ భూములు చేరడంతో ఆందోళన చెందుతున్న హక్కుదారులకు ముఖ్యమంత్రి ఎ. రేవంత్ రెడ్డి కీలక భరోసా ఇచ్చారు. ఏదైనా కారణంతో భూమి 22-A జాబితాలో చేరినా, చట్టబద్ధంగా కొనుగోలు చేసిన హక్కుదారుల స్థలాలు ఎక్కడికీ పోవని స్పష్టం చేశారు. సంబంధిత సర్వే నంబర్లను పరిశీలించి, కోర్టు వివాదాల్లో ఉన్న భూములను మినహాయించి మిగిలిన భూములకు బై-నంబర్లు కేటాయించడం ద్వారా సమస్యను పరిష్కరిస్తామని సీఎం తెలిపారు.
కూకట్పల్లి కేపీహెచ్బీ కాలనీలో కోర్ అర్బన్ (CURE) ప్రాంత పరిధిలో ఇందిరమ్మ ఇండ్లు (టవర్స్) నిర్మాణానికి సీఎం రేవంత్ రెడ్డి గురువారం శంకుస్థాపన చేశారు. మంత్రులు పొంగులేటి శ్రీనివాస్ రెడ్డి, శ్రీధర్ బాబు, పొన్నం ప్రభాకర్తో పాటు పలువురు ప్రజాప్రతినిధుల సమక్షంలో భూమిపూజ నిర్వహించారు.
👉 ఈ సందర్భంగా ఏర్పాటు చేసిన సభలో 22-A భూముల సమస్యపై సీఎం ప్రత్యేకంగా స్పందించారు..,
కోర్టు కేసులు ఉన్న కొన్ని భూముల కారణంగా మొత్తం సర్వే నంబర్లోని భూములను నిషేధిత జాబితాలో చేర్చిన సందర్భాలు ఉన్నాయని చెప్పారు. కోర్టు పరిధిలో ఉన్న స్థలాలను పక్కనపెట్టి, వివాదం లేని భూములకు బై-నంబర్లు కేటాయించి హక్కుదారుల సమస్యలను పరిష్కరిస్తున్నట్లు వివరించారు.
👉 “22-Aలో మీ భూమి ఉన్నా ఆందోళన చెందాల్సిన అవసరం లేదు. కొనుగోలు చేసిన హక్కుదారుల స్థలాలు ఎక్కడికీ పోవు. సమస్యను పరిష్కరించేందుకు ప్రభుత్వం చర్యలు తీసుకుంటుంది” అని సీఎం స్పష్టం చేయడం ఈ అంశంపై నెలకొన్న అనిశ్చితికి కొంతమేర తెరదించినట్లయింది.
👉 పేదల సొంతింటి కలకు కొత్త రూపం !
కూకట్పల్లిలో వందల కోట్ల విలువైన 11 ఎకరాల విస్తీర్ణంలో ఇందిరమ్మ టవర్స్ నిర్మాణం చేపట్టడం ద్వారా నగరంలోని నిరుపేదలకు వారు నివసిస్తున్న ప్రాంతాల్లోనే సొంత ఇళ్లు అందించాలన్న ప్రభుత్వ లక్ష్యాన్ని సీఎం వివరించారు. పేదలకు అందించే ఇళ్లకు స్థలాన్ని ఉచితంగా ఇవ్వడంతో పాటు రిజిస్ట్రేషన్ చార్జీలను కూడా రద్దు చేసే అంశాన్ని పరిశీలించాలని మంత్రులకు సూచించారు.
👉 లబ్ధిదారులు నిర్మాణ వ్యయంలో కొంత భాగం భరిస్తే, నిర్మాణ ప్రక్రియలో భాగస్వాములుగా మారి తమ ఇళ్ల నిర్మాణాన్ని స్వయంగా పరిశీలించే అవకాశం ఉంటుందని సీఎం తెలిపారు. కూకట్పల్లి, కుత్బుల్లాపూర్, మేడ్చల్, కంటోన్మెంట్, ఎల్బీనగర్, ఉప్పల్ తదితర ప్రాంతాల్లో అధిక సంఖ్యలో నివసిస్తున్న పేదలకు ప్రాధాన్యతనిస్తూ ఇళ్ల నిర్మాణాన్ని ముందుకు తీసుకెళ్తామని చెప్పారు.
👉 కూకట్పల్లి అభివృద్ధిపై ప్రత్యేక దృష్టి !
కూకట్పల్లి నియోజకవర్గ అభివృద్ధికి ప్రత్యేక ప్రాధాన్యం ఇవ్వాలని మంత్రి శ్రీధర్బాబుకు సీఎం సూచించారు. రహదారులు, ఫ్లైఓవర్లు, చెరువుల పునరుద్ధరణతో పాటు విద్యా సంస్థలు, పరిశ్రమలు, ఉద్యోగ-ఉపాధి అవకాశాల కల్పనపై దృష్టి సారించాలని అన్నారు.
👉 సంక్షేమం.. అభివృద్ధిపై సీఎం లెక్కలు!
తమ ప్రభుత్వం రెండేళ్ల పాలనలో సంక్షేమ పథకాలను కొనసాగించడంతో పాటు అదనపు కార్యక్రమాలను చేపట్టిందని సీఎం తెలిపారు. రాష్ట్రంలోని 3.28 కోట్ల మందికి ఒక్కొక్కరికి నెలకు ఆరు కిలోల సన్నబియ్యం, 200 యూనిట్ల వరకు ఉచిత విద్యుత్, రూ.500కే గ్యాస్ సిలిండర్ వంటి పథకాలను అమలు చేస్తున్నామని చెప్పారు.
మహిళలకు ఉచిత ఆర్టీసీ ప్రయాణం, స్వయం సహాయక సంఘాలకు బ్యాంకు లింకేజీ, మహిళా సంఘాల ఆధ్వర్యంలో బస్సుల నిర్వహణ, సోలార్ విద్యుత్ ఉత్పత్తి, ఇందిరా మహిళా బజార్ల ఏర్పాటు వంటి కార్యక్రమాలను కూడా సీఎం ప్రస్తావించారు. రెండేళ్లలో ప్రభుత్వ శాఖల్లో 70 వేల ఉద్యోగాలను భర్తీ చేసినట్లు వెల్లడించారు.
👉 “వికాసం వైపు తెలంగాణను నడిపిస్తాం”!
ప్రజల అభివృద్ధి కోసం ప్రభుత్వం చిత్తశుద్ధితో పనిచేస్తోందని సీఎం అన్నారు. తెలంగాణను అభివృద్ధి, వికాసం వైపు నడిపించేందుకు రోజుకు 18 గంటలు పనిచేసే శక్తిని దేవుడు ఇచ్చారని, అందుకు ప్రజల ఆశీర్వాదం కావాలని కోరారు.
మొత్తంగా.. కూకట్పల్లి వేదికగా సీఎం చేసిన ప్రకటనలో రెండు అంశాలు ప్రధానంగా నిలిచాయి. ఒకవైపు 22-A జాబితాలో ఉన్న భూముల హక్కుదారులకు పరిష్కార మార్గం చూపిస్తామని హామీ ఇవ్వడం, మరోవైపు నగరంలోని నిరుపేదలకు సొంతింటి కలను సాకారం చేసేందుకు ఇందిరమ్మ టవర్స్ నిర్మాణాన్ని ప్రారంభించడం.