👉 రక్తసంబంధం లేకున్నా.. పేరు బంధంతో మానవత్వపు చేయూత !
👉 శివ గాయత్రి అనాథ వృద్ధాశ్రమం నిర్వాహకుడు, రిటైర్డ్ ఏఎస్ఐ రాజేశుని శ్రీనివాస్ ఔదార్యం !
J . SURENDER KUMAR ,
మనిషి సంపాదించే ఆస్తులు, అంతస్తుల కంటే.. ఆపదలో ఉన్న తోటి మనిషికి అందించే ఆపన్నహస్తమే గొప్ప సంపద. బతికున్నప్పుడు అన్నం పెట్టడం ఎంత గొప్పో.. మరణించిన తర్వాత అనాథగా మిగిలిన మృతదేహానికి గౌరవప్రదమైన అంతిమ వీడ్కోలు పలకడం అంతకంటే గొప్ప మానవీయ సంస్కారం. అలాంటి అరుదైన మానవత్వానికి నిలువెత్తు నిదర్శనంగా నిలిచారు జగిత్యాలకు చెందిన రిటైర్డ్ ఏఎస్ఐ, శివ గాయత్రి అనాథ వృద్ధాశ్రమం అధ్యక్షుడు రాజేశుని శ్రీనివాస్…
👉 పేరు బంధమే.. ఆత్మీయతకు వారధి !
తొమ్మిది నెలల క్రితం మతిస్థిమితం సరిగా లేక రోడ్లపై తిరుగుతున్న శ్రీనివాస్ అనే వ్యక్తిని గమనించిన ఇద్దరు వ్యక్తులు.. ఆయనను రాజేశుని గుట్టలోని శివ గాయత్రి అనాథ వృద్ధాశ్రమంలో చేర్పించారు. తొమ్మిది నెలల నుంచి ఆశ్రమంలోనే ఉంటున్న ఆయన ఆరోగ్యం క్రమంగా మెరుగుపడుతున్నట్లు కనిపించినప్పటికీ.. బుధవారం ఉదయం అనూహ్యంగా కన్నుమూశారు.
ఉదయం ఆరోగ్యం బాగాలేదని, చలిగా ఉందని చెప్పిన ఆయన టీ తాగి, బెడ్‌షీట్ కప్పుకొని విశ్రాంతి తీసుకుంటానని పడుకున్నారు. ఆశ్రమ మేనేజర్ మోటూరి నాగలింగం ఆర్ఎంపీ వైద్యుడిని తీసుకువచ్చి చూపించగా.. అప్పటికే శ్రీనివాస్ మరణించినట్లు నిర్ధారించారు.
కుటుంబ సభ్యులు ఎవరు ? ఆయన స్వస్థలం ఎక్కడ ?
ఆయన కోసం కన్నీరు పెట్టుకునే ఆత్మీయులు ఉన్నారా? అనే ప్రశ్నలకు సమాధానం తెలియని పరిస్థితి. చివరకు ఆయన మృతదేహానికి అంతిమ సంస్కారాలు నిర్వహించాల్సిన బాధ్యతను ఆశ్రమ నిర్వాహకులే తమ భుజాలపై వేసుకున్నారు.
👉 అనాథ శవం కాదు.. ఆత్మీయుడి అంతిమ ప్రయాణం !
సాధారణంగా మనిషి మరణించినప్పుడు కుటుంబ సభ్యులు, బంధువులు అంతిమ సంస్కారాలు నిర్వహిస్తారు. కానీ ఎవరూ లేని అనాథకు ఆ చివరి వీడ్కోలు ఎవరు పలుకుతారు? అనే ప్రశ్నకు తన చేతలతో సమాధానమిచ్చారు రాజేశుని శ్రీనివాస్.
వెంటనే వైకుంఠ రథాన్ని ఏర్పాటు చేసి, జగిత్యాలలోని చింతకుంట శ్మశానవాటికకు మృతదేహాన్ని తరలించారు. హిందూ సంప్రదాయం ప్రకారం అంత్యక్రియలు నిర్వహించి, ఆ అభాగ్యుడికి గౌరవప్రదమైన వీడ్కోలు పలికారు.
రక్తసంబంధం లేదు.. కుటుంబ అనుబంధం లేదు.. ఆస్తిపాస్తుల సంబంధం అంతకంటే లేదు. అయినప్పటికీ, తన పేరుతోనే పేరు కలిగిన శ్రీనివాస్‌ను అనాథగా వదిలేయకుండా.. అతని అంతిమ ప్రయాణంలో అన్నీ తానై నిలిచారు రాజేశుని శ్రీనివాస్. మనిషి చనిపోయిన తర్వాత కూడా అతని గౌరవాన్ని కాపాడటమే నిజమైన మానవత్వమని తన సేవ ద్వారా చాటిచెప్పారు.
👉 పండుగల పవిత్రత.. సేవలోనే నిజమైన సంస్కారం !
దసరా నవరాత్రుల వంటి పవిత్రమైన రోజుల్లో కుటుంబ సభ్యులతో కలిసి పండుగలు జరుపుకోవడం మన సంప్రదాయం. అయితే సమాజంలో ఆత్మీయతకు దూరమైన అభాగ్యులకు అండగా నిలవడం కూడా అంతే గొప్ప ధర్మం. సాంప్రదాయ కుటుంబానికి చెందిన రాజేశుని శ్రీనివాస్.. సమాజసేవను తన బాధ్యతగా భావిస్తూ, అనాథ వృద్ధులకు ఆశ్రయం కల్పించడమే కాకుండా, ఎవరూ లేని మృతుడికి కూడా గౌరవప్రదమైన అంతిమ సంస్కారాలు నిర్వహించడం పలువురి ప్రశంసలు అందుకుంది.
యజ్ఞాలు, యాగాలు, పూజలు మన సంప్రదాయంలో పవిత్రమైనవి. అయితే ఆపదలో ఉన్న మనిషికి అండగా నిలవడం, అనాథకు ఆత్మీయత పంచడం, మరణించిన వ్యక్తికి గౌరవంగా అంతిమ వీడ్కోలు పలకడం కూడా మానవ ధర్మంలో అత్యున్నతమైన కార్యాలే. అందుకే అనాథ మృతదేహానికి అంత్యక్రియలు నిర్వహించిన ఈ సేవను కోటి యజ్ఞాల పుణ్యఫలంతో పోల్చడంలో అతిశయోక్తి లేదనే భావన వ్యక్తమవుతోంది.
👉 పుట్టినరోజులు.. పెళ్లిరోజులు.. పెద్దల జ్ఞాపకాలు సేవకు వేదికలు కావాలి !
ఈ సందర్భంగా రాజేశుని శ్రీనివాస్ మాట్లాడుతూ, ఇంకా ఎవరైనా అనాథ వృద్ధులు ఉన్నట్లయితే తమ ఆశ్రమంలో చేర్చుకుంటామని తెలిపారు. సమాజంలో నిరాదరణకు గురైన వృద్ధులకు ఆశ్రయం కల్పించేందుకు ప్రతి ఒక్కరూ ముందుకు రావాలని పిలుపునిచ్చారు.
పుట్టినరోజులు, వివాహ వార్షికోత్సవాలు, తమ పెద్దల జయంతి, వర్ధంతి వంటి సందర్భాలను వృద్ధాశ్రమాల్లోని పెద్దల సమక్షంలో జరుపుకోవాలని సూచించారు. వారికి భోజన సదుపాయం కల్పించి, వారి ఆశీస్సులు పొందితే కుటుంబ పెద్దల సమక్షంలో వేడుకలు జరుపుకున్న తృప్తి కలుగుతుందని పేర్కొన్నారు.
ఈ కార్యక్రమంలో ఆశ్రమ ప్రధాన కార్యదర్శి రంగు రాజయ్య, కోశాధికారి కప్పల చంద్రమౌళి, ఆశ్రమ నిర్వాహకులు, మేనేజర్ మోటూరి నాగలింగం, ఆశ్రమంలోని వృద్ధులు పాల్గొన్నారు. అనాథ శ్రీనివాస్‌కు అంతిమ సంస్కారాలు నిర్వహించిన రాజేశుని శ్రీనివాస్ సేవలను వారు కొనియాడారు.
👉 సమాజానికి సందేశం ఒక్కటే !
బతికున్నప్పుడు ఆకలికి అన్నం పెట్టాలి.. ఒంటరితనంలో ఆత్మీయత పంచాలి.. మరణించినప్పుడు గౌరవప్రదమైన వీడ్కోలు పలకాలి. మనిషికి మనిషే బంధువు అనే సత్యాన్ని చాటిచెప్పిన రాజేశుని శ్రీనివాస్ సేవ.. సమాజంలోని ప్రతి ఒక్కరికీ స్ఫూర్తిదాయకం. ఎందుకంటే మనిషి గొప్పతనం అతని హోదాలో కాదు.. ఎవరికీ లేని సమయంలో ఎంతమందికి అండగా నిలిచాడనే దానిలోనే ఉంటుంది.