👉 వరి సాగుకు విరామం ఇవ్వండి.. ఆరుతడి పంటల వైపు అడుగులు వేయండి !
👉 ఎల్‌నినో ప్రభావంతో రానున్న ఎనిమిది నెలలు అప్రమత్తంగా ఉండాలి..!
👉 రైతులను తప్పుదారి పట్టించే ప్రయత్నాలను నమ్మవద్దు.. ప్రభుత్వం మీకు అండగా ఉంటుంది !
👉 కొడంగల్ రైతు మేళా వేదికగా రైతాంగానికి ముఖ్యమంత్రి రేవంత్ రెడ్డి హృదయపూర్వక విజ్ఞప్తి !
J .SURENDER KUMAR
రైతు పండిస్తేనే సమాజానికి అన్నం.. రైతు బాగుంటేనే దేశానికి భరోసా. అలాంటి రైతు సాగు చేసిన పంట చేతికందకపోతే ఆ కుటుంబం పడే ఆవేదన వర్ణనాతీతం. అందుకే పంట వేయడానికి ముందే ఒక్కసారి ఆలోచించండి.. నీటి లభ్యతను అంచనా వేసుకోండి.. ఈ సీజన్‌లో వరి సాగుకు బదులుగా నీరు తక్కువగా అవసరమయ్యే ఆరుతడి పంటలు సాగు చేయండి అంటూ ముఖ్యమంత్రి రేవంత్ రెడ్డి రైతాంగానికి విజ్ఞప్తి చేశారు.
“మీకన్నా నాకు ఆత్మబంధువులెవరూ లేరు.. మీకు కష్టం వస్తే ప్రభుత్వం అండగా ఉంటుంది. మీ సోదరుడిగా అడుగుతున్నా.. పంటలు వేసే ముందు ఒక్కసారి ఆలోచన చేయండి” అంటూ సీఎం చేసిన విజ్ఞప్తి రైతాంగంలో చర్చనీయాంశంగా మారింది.
👉ఎల్‌నినో ముప్పు.. ముందస్తు జాగ్రత్తే మేలు !
ప్రపంచవ్యాప్తంగా ఎల్‌నినో ప్రభావం కారణంగా వాతావరణ పరిస్థితుల్లో మార్పులు, వర్షాభావం, తీవ్రమైన ఎండలు ఏర్పడే అవకాశాలున్నాయని ముఖ్యమంత్రి ఆందోళన వ్యక్తం చేశారు. రాబోయే ఎనిమిది నెలలు రాష్ట్రానికి కీలకమని, ఇప్పటి నుంచి వచ్చే జూలై వరకు వర్షాలు ఆశించిన స్థాయిలో కురిసే పరిస్థితి లేదని హెచ్చరించారు.
రాష్ట్రంలోని ప్రాజెక్టుల్లో నీటి నిల్వలు తగ్గిపోయాయని, ఒకప్పుడు ఇదే సమయంలో వందల టీఎంసీల నీటితో కళకళలాడే ప్రాజెక్టులు ప్రస్తుతం నీటి కొరతను ఎదుర్కొంటున్నాయని వివరించారు.
నీరు తక్కువగా అవసరమయ్యే పంటల సాగుతో పాటు అందుబాటులో ఉన్న నీటిని పొదుపుగా వినియోగించుకోవాలని రైతులకు సూచించారు.
👉 రైతులను తప్పుదారి పట్టించవద్దు..!
కరవు పరిస్థితులపై కొందరు రకరకాలుగా మాట్లాడుతున్నారని, రైతులను తప్పుదారి పట్టించే ప్రయత్నాలు జరుగుతున్నాయని సీఎం పేర్కొన్నారు. రైతుల ప్రయోజనాలను దృష్టిలో ఉంచుకునే ప్రభుత్వం ముందస్తు సూచనలు చేస్తోందని స్పష్టం చేశారు.
ఎల్‌నినో ప్రభావం, నీటి లభ్యత, కాళేశ్వరం ప్రాజెక్టుతో పాటు గోదావరి, కృష్ణా జలాల వినియోగంపై డిసెంబర్‌లో రెండు మూడు రోజులపాటు అసెంబ్లీ ప్రత్యేక సమావేశాలు నిర్వహించి సమగ్రంగా చర్చిస్తామని తెలిపారు.
ప్రాజెక్టుల నీటి లభ్యత, సాగునీటి అవసరాలు, తాగునీటి ప్రాధాన్యత వంటి అంశాలపై ప్రజలకు పూర్తి వివరాలు వెల్లడిస్తామని చెప్పారు.
👉 రైతుకు కష్టం వస్తే ప్రభుత్వం తోడుగా ఉంటుంది..!
సంక్రాంతి తర్వాత ప్రజాబలం కార్యక్రమం ద్వారా అన్ని ప్రాంతాల్లో పర్యటించి ప్రజలను కలుస్తానని ముఖ్యమంత్రి తెలిపారు. కష్టకాలంలో రైతులకు అండగా ఉంటామని భరోసా ఇచ్చారు.
“మనమందరం ఏకమై ఎల్‌నినో ప్రభావాన్ని ఎదుర్కొందాం. రైతులు, ప్రజలు, ప్రభుత్వం సమిష్టిగా పనిచేస్తే ఎదురయ్యే సవాళ్లను అధిగమించవచ్చు” అని పిలుపునిచ్చారు.
👉పాలమూరుకు నీళ్లు.. కొడంగల్‌కు పరిశ్రమలు…!
హకీంపేటలో నిర్వహించిన మెగా రైతు మేళా, పారిశ్రామిక ప్రదర్శనను ప్రారంభించిన ముఖ్యమంత్రి వ్యవసాయ శాస్త్రవేత్తలు, ఆదర్శ రైతులతో ముఖాముఖి మాట్లాడారు.
పాలమూరు ప్రాంతంలో సాగునీటి సమస్యల పరిష్కారానికి కల్వకుర్తి, భీమా, నెట్టెంపాడు, కోయిల్‌సాగర్, పాలమూరు-రంగారెడ్డి, మక్తల్-నారాయణపేట-కొడంగల్ ఎత్తిపోతల పథకాల ప్రాధాన్యతను వివరించారు. గతంలో చేపట్టిన పలు సాగునీటి ప్రాజెక్టులు ఆశించిన పురోగతి సాధించలేదని పేర్కొన్నారు.
కొడంగల్ ప్రాంతాన్ని హైదరాబాద్ నుంచి లగచర్ల వరకు పారిశ్రామిక హబ్‌గా తీర్చిదిద్దుతామని, వేల కోట్ల పెట్టుబడులతో పరిశ్రమలు తీసుకొచ్చి స్థానిక యువతకు ఉద్యోగావకాశాలు కల్పిస్తామని తెలిపారు.
వ్యవసాయంతో పాటు విద్య, వైద్యం, పరిశ్రమలు, ఉపాధి రంగాల్లో కొడంగల్‌ను అభివృద్ధి నమూనాగా తీర్చిదిద్దే లక్ష్యంతో ముందుకు సాగుతున్నామని చెప్పారు.
👉 రైతు ఆలోచించాలి.. సమాజం సహకరించాలి..!
ముఖ్యమంత్రి చేసిన విజ్ఞప్తిలో అంతర్లీనంగా ఉన్నది ఒక్కటే.. రైతు నష్టపోకూడదు.. పంట చేతికందని పరిస్థితి రాకూడదు.. తాగునీటికి ఇబ్బందులు ఎదురుకాకూడదు.
అయితే రైతు పంట మార్పిడికి సిద్ధపడాలంటే ప్రత్యామ్నాయ పంటలకు మార్కెట్, గిట్టుబాటు ధర, విత్తనాలు, సాగు సలహాలు, అవసరమైన ఆర్థిక భరోసా కూడా అందుబాటులో ఉండాలి. ప్రభుత్వ సూచనలకు అనుగుణంగా రైతులకు అవసరమైన సహకారం అందించడం కూడా కీలకం.
రైతు పొలంలో పంట పండితేనే ప్రతి ఇంట్లో సంక్రాంతి వెలుగులు. అందుకే ఈ రోజు తీసుకునే సాగు నిర్ణయం రేపటి రైతు కుటుంబ భవిష్యత్తును నిర్ణయించవచ్చు. రైతు బాగుండాలి.. వ్యవసాయం నిలవాలి.. తెలంగాణ పచ్చగా ఉండాలి.. ఇదే ఈ విజ్ఞప్తి వెనుక ఉన్న ప్రధాన సందేశం.