👉 ఐఏఎస్, ఐపీఎస్ అవుతున్న యువత కు
రాజకీయాల్లో అవకాశం ఎందుకు ఉండకూడదు ?
👉 శాసనసభ, లోక్సభ పోటీ వయస్సును 25 నుంచి 21 ఏళ్లకు తగ్గించాలని కేంద్రానికి తీర్మానం.!
👉 సీఎం రేవంత్ రెడ్డి సంచలన ప్రతిపాదన !
J SURENDER KUMAR,
దేశ రాజకీయాల్లో యువత పాత్రను మరింత బలోపేతం చేసే దిశగా తెలంగాణ ముఖ్యమంత్రి రేవంత్ రెడ్డి కీలక ప్రతిపాదన చేశారు. 21 ఏళ్లకే యువత ఐఏఎస్, ఐపీఎస్, ఐఎఫ్ఎస్ వంటి అత్యున్నత సర్వీసుల్లో ఎంపిక అవుతున్నప్పుడు, అదే వయస్సులో ఎమ్మెల్యేలు లేదా ఎంపీలు అయ్యే అవకాశం ఎందుకు ఉండకూడదని ప్రశ్నించారు. శాసనసభ, లోక్సభ ఎన్నికల్లో పోటీ చేసే కనీస వయోపరిమితిని ప్రస్తుతం ఉన్న 25 ఏళ్ల నుంచి 21 ఏళ్లకు తగ్గించేలా పార్లమెంట్ చట్టాన్ని సవరించాలని కేంద్ర ప్రభుత్వాన్ని కోరారు.
నీట్ పరీక్షల్లో అవకతవకలు, ప్రశ్నాపత్రాల లీకేజీలు, వాటి ప్రభావంతో విద్యార్థుల్లో నెలకొన్న ఆందోళనల నేపథ్యంలో “యువతే దేశం – దేశమే యువత” పేరుతో నిర్వహించిన కొవ్వొత్తుల ర్యాలీలో పాల్గొన్న సీఎం, యువతకు రాజకీయాల్లో సముచిత ప్రాతినిధ్యం కల్పించాల్సిన అవసరాన్ని నొక్కిచెప్పారు.
👉 ప్రత్యేక శాసనసభ సమావేశం.. కేంద్రానికి తీర్మానం!
ఆగస్టు మొదటి వారంలో తెలంగాణ శాసనసభ, శాసనమండలిని ప్రత్యేకంగా సమావేశపరచి, చట్టసభలకు పోటీ చేసే కనీస వయస్సును 21 ఏళ్లకు తగ్గించాలని కోరుతూ తీర్మానం ఆమోదించి కేంద్ర ప్రభుత్వానికి పంపిస్తామని సీఎం ప్రకటించారు. అనంతరం పార్లమెంట్లో చట్ట సవరణ జరిగేలా రాష్ట్ర ప్రభుత్వం అన్ని విధాలా ప్రయత్నిస్తుందని స్పష్టం చేశారు.
👉 చరిత్రను గుర్తు చేసిన సీఎం !
మాజీ ప్రధాని రాజీవ్ గాంధీ 61వ రాజ్యాంగ సవరణ ద్వారా ఓటు హక్కు వయస్సును 21 నుంచి 18 ఏళ్లకు తగ్గించారని, అలాగే మాజీ ప్రధాని పీవీ నరసింహారావు హయాంలో స్థానిక సంస్థల ఎన్నికల్లో పోటీ చేసే కనీస వయస్సును 21 ఏళ్లకు తగ్గించారని గుర్తు చేశారు. అదే స్ఫూర్తితో ఇప్పుడు శాసనసభలు, పార్లమెంట్ ఎన్నికల్లోనూ యువతకు అవకాశం కల్పించాల్సిన సమయం వచ్చిందన్నారు.
👉 ప్రపంచ దేశాల ఉదాహరణలు !
జర్మనీ, బ్రిటన్ వంటి దేశాల్లో 18 ఏళ్లకే చట్టసభలకు పోటీ చేసే అవకాశం ఉందని, సింగపూర్లో 21 ఏళ్లు పూర్తయితే ప్రధానమంత్రి అయ్యే అవకాశమూ ఉందని పేర్కొంటూ, భారతదేశంలో కూడా యువతకు అలాంటి అవకాశాలు కల్పించాలన్నారు.
👉”జెన్ జీ గళం చట్టసభల్లో వినిపించాలి”!
ప్రస్తుతం దేశ జనాభాలో దాదాపు 30 శాతం మంది Gen Z యువత ఉన్నప్పటికీ, చట్టసభల్లో వారి ప్రాతినిధ్యం అత్యల్పంగా ఉందని సీఎం ఆవేదన వ్యక్తం చేశారు. దేశ భవిష్యత్తును నిర్మించేది యువతేనని, వారి ఆలోచనలు, ఆశయాలు విధాన నిర్ణయాల్లో ప్రతిబింబించాలంటే చట్టసభల్లోనూ వారికి స్థానం కల్పించాల్సిందేనని స్పష్టం చేశారు.
ఈ కార్యక్రమంలో ఉప ముఖ్యమంత్రి మల్లు భట్టి విక్రమార్క, మంత్రులు దుద్దిళ్ల శ్రీధర్ బాబు, పొన్నం ప్రభాకర్, పొంగులేటి శ్రీనివాస రెడ్డి, అడ్లూరి లక్ష్మణ్ కుమార్, మహమ్మద్ అజారుద్దీన్, ఎమ్మెల్సీ మహేష్ కుమార్ గౌడ్తో పాటు పలువురు ప్రజాప్రతినిధులు, విద్యార్థులు, యువత పెద్ద సంఖ్యలో పాల్గొన్నారు.
యువత రాజకీయ సాధికారతపై సీఎం రేవంత్ రెడ్డి చేసిన ఈ ప్రతిపాదన దేశవ్యాప్తంగా చర్చకు దారితీసే అవకాశాలు కనిపిస్తున్నాయి.