👉 తెలంగాణ ఫ్యామిలీ రిజిస్టర్’కు శ్రీకారం !
👉 ప్రతి కుటుంబానికి ఒకే అధికారిక డిజిటల్ గుర్తింపు !
👉 మీ సేవ ద్వారా రెండు రోజుల్లో ఫ్యామిలీ రిజిస్టర్ సర్టిఫికెట్ !
J.SURENDER KUMAR,
తెలంగాణలో కుటుంబ ఆధారిత పరిపాలనకు రేవంత్ రెడ్డి ప్రభుత్వం శ్రీకారం చుట్టింది. రాష్ట్రంలోని ప్రతి కుటుంబానికి ఒకే అధికారిక డిజిటల్ రికార్డు అందుబాటులో ఉండేలా ‘తెలంగాణ ఫ్యామిలీ రిజిస్టర్’ ఏర్పాటు చేస్తూ ప్రభుత్వం ఉత్తర్వులు జారీ చేసింది.
👉 రెవెన్యూ శాఖ ఈనెల 25న విడుదల చేసిన G.O.Ms.No.172 ప్రకారం ఇకపై కుటుంబ సభ్యుల వివరాలను ఒకే రిజిస్టర్లో నమోదు చేసి, అవసరమైనప్పుడు మీ సేవ కేంద్రాల ద్వారా ‘ఫ్యామిలీ రిజిస్టర్ సర్టిఫికెట్’ జారీ చేయనున్నారు.
👉 రేషన్ కార్డు డేటాబేస్ను ఆధారంగా తీసుకుని కుటుంబ పెద్ద పేరు, సభ్యుల వివరాలు, వారి సంబంధం, జన్మతేదీ, ఆధార్ నంబర్, చిరునామా తదితర సమాచారంతో ఈ రిజిస్టర్ రూపొందుతుంది. దరఖాస్తు చేసిన రెండు పని దినాల్లో తహసీల్దార్ డిజిటల్ సంతకంతో సర్టిఫికెట్ అందజేయాలని ప్రభుత్వం నిర్ణయించింది.
👉 ప్రభుత్వ సేవల కోసం ఒకే కుటుంబానికి సంబంధించిన వివరాలను పలుమార్లు సమర్పించాల్సిన అవసరాన్ని తగ్గించడం, అన్ని శాఖల్లో ఒకే ప్రామాణిక కుటుంబ సమాచారాన్ని వినియోగించడం ఈ నిర్ణయం వెనుక ప్రధాన ఉద్దేశ్యంగా ప్రభుత్వం పేర్కొంది.
👉 ఈ ఫ్యామిలీ రిజిస్టర్ ఆస్తి హక్కులు, వారసత్వ హక్కులు లేదా ప్రభుత్వ సంక్షేమ పథకాల అర్హతను నిర్ణయించే పత్రం కాదని G.Oలో స్పష్టంగా పేర్కొంది.
👉 రాజకీయంగా కీలకం.!
రేవంత్ రెడ్డి ప్రభుత్వం సంక్షేమ పథకాల అమలులో ‘కుటుంబం’ను పరిపాలనా యూనిట్గా మరింత బలోపేతం చేసే దిశగా ఈ నిర్ణయాన్ని తీసుకున్నట్లు కనిపిస్తోంది. భవిష్యత్తులో కొత్త సంక్షేమ పథకాల అమలు, లబ్ధిదారుల గుర్తింపు, సేవల పంపిణీ వంటి అంశాల్లో ఈ డిజిటల్ ఫ్యామిలీ రిజిస్టర్ కీలక పాత్ర పోషించే అవకాశాలు కనిపిస్తున్నాయి. పరిపాలనా సంస్కరణగా మొదలైన ఈ వ్యవస్థ, రాబోయే రోజుల్లో ప్రభుత్వ పాలనా విధానంలో కీలక మార్పులకు నాంది కావచ్చనే చర్చ అధికార వర్గాల్లో వినిపిస్తోంది.