👉 ఆర్బీఐ ప్రతిపాదనకు కేంద్ర ప్రభుత్వం ఆమోదం !
👉 తొలి దశలో ₹10, ₹ 20 విలువల పాలిమర్ నోట్ల ఫీల్డ్ ట్రయల్స్ !
👉 కాగితపు కరెన్సీని పూర్తిగా తొలగించే ప్రతిపాదన లేదన్న కేంద్రం !
J.SURENDER KUMAR,
దేశంలో కరెన్సీ వ్యవస్థను మరింత ఆధునికంగా, భద్రంగా తీర్చిదిద్దే దిశగా కేంద్ర ప్రభుత్వం కీలక నిర్ణయం తీసుకుంది. రిజర్వ్ బ్యాంక్ ఆఫ్ ఇండియా (ఆర్బీఐ) ప్రతిపాదించిన పాలిమర్ (ప్లాస్టిక్) కరెన్సీ నోట్ల ప్రవేశానికి కేంద్ర ప్రభుత్వం ఆమోదం తెలిపింది. ఈ విషయాన్ని జూలై 27న లోక్సభలో అడిగిన అన్స్టార్డ్ ప్రశ్న నెం.1335కు కేంద్ర ఆర్థిక శాఖ సహాయ మంత్రి పంకజ్ చౌదరి లిఖితపూర్వక సమాధానంలో వెల్లడించారు.
👉 ఆర్బీఐ సెంట్రల్ బోర్డు సిఫారసు మేరకు తొలి దశలో ₹.10, ₹ 20 విలువల పాలిమర్ నోట్లను ఒక్కోటి 100 కోట్ల చొప్పున ఫీల్డ్ ట్రయల్స్ కోసం ముద్రించాలని, ఆ ప్రయోగాలు విజయవంతమైతే ఈ రెండు డినామినేషన్లలో సాధారణ చలామణికి కూడా విడుదల చేయాలని ప్రతిపాదించింది.
👉 ఈ ప్రతిపాదనకు కేంద్ర ప్రభుత్వం ఆమోదం తెలిపింది.
ఆర్బీఐ తెలిపిన వివరాల ప్రకారం, అంతర్జాతీయ అధ్యయనాల్లో పాలిమర్ నోట్లు కాగితపు నోట్లతో పోలిస్తే గణనీయంగా ఎక్కువ కాలం మన్నికగా ఉంటాయని తేలింది. దీంతో నోట్ల ముద్రణ, మార్పిడి వ్యయం తగ్గే అవకాశంతో పాటు నకిలీ కరెన్సీ నియంత్రణలో కూడా ఇవి మరింత సమర్థవంతంగా ఉండే అవకాశం ఉందని పేర్కొంది.
👉 అయితే పాలిమర్ నోట్ల ప్రవేశం ప్రస్తుతం ప్రాథమిక దశలోనే ఉందని కేంద్ర ప్రభుత్వం స్పష్టం చేసింది. ఇవి సాధారణ చలామణిలోకి వచ్చిన తర్వాతే డిజిటల్ చెల్లింపులపై వాటి ప్రభావాన్ని అంచనా వేయగలమని తెలిపింది.
👉 అలాగే నగదు చెల్లింపులు, డిజిటల్ చెల్లింపులు రెండూ ప్రజలకు పరస్పర పూరక చెల్లింపు వ్యవస్థలేనని వివరించింది. ముఖ్యంగా, ప్రస్తుతం ఉన్న కాగితపు కరెన్సీని పూర్తిగా తొలగించే ప్రతిపాదన ఏదీ లేదని కేంద్ర ప్రభుత్వం స్పష్టం చేసింది. పాలిమర్ నోట్లు కాగితపు నోట్లతో పాటు సమాంతరంగా చలామణిలో కొనసాగనున్నాయని వెల్లడించింది.
👉 నకిలీకి అడ్డుకట్ట ..?
పాలిమర్ కరెన్సీ ప్రవేశపెట్టే నిర్ణయం భారత కరెన్సీ వ్యవస్థలో ఒక కీలక సంస్కరణగా భావిస్తున్నారు. నోట్ల మన్నిక పెరగడం, నకిలీ కరెన్సీకి అడ్డుకట్ట వేయడం, దీర్ఘకాలంలో ముద్రణ వ్యయాన్ని తగ్గించడం వంటి లక్ష్యాలతో ఈ నిర్ణయం తీసుకున్నట్లు స్పష్టమవుతోంది. అదే సమయంలో కాగితపు కరెన్సీని పూర్తిగా రద్దు చేయబోమని కేంద్రం స్పష్టం చేయడం ద్వారా నగదు చలామణి కొనసాగుతుందనే భరోసా కూడా ఇచ్చింది.