👉 ఆటో డ్రైవర్లకు ₹ 1.50 లక్షల వరకు సబ్సిడీ !
👉 “ఆటోకు ఈ-మార్పు.. హైదరాబాద్కు కాలుష్య విముక్తి.!
👉 ₹ 200 కోట్లతో తెలంగాణ ఆటో రిక్షా ఎలక్ట్రిక్ కన్వర్షన్ స్కీమ్ !
👉 సీఎం రేవంత్ రెడ్డి అధ్యక్షతన జరిగిన మంత్రివర్గంలో తీర్మానం!
J SURENDER KUMAR,
హైదరాబాదును కాలుష్య రహిత, హరిత నగరంగా తీర్చిదిద్దే దిశగా తెలంగాణ ప్రభుత్వం మరో కీలక అడుగు వేసింది. పెట్రోల్, డీజిల్ ఆటో రిక్షాలను ఎలక్ట్రిక్ వాహనాలుగా మార్చేందుకు రాష్ట్ర కేబినెట్ శుక్రవారం కీలక నిర్ణయం తీసుకుంది. ఇందుకోసం ₹ 200 కోట్లతో తెలంగాణ ఆటో రిక్షా ఎలక్ట్రిక్ కన్వర్షన్ స్కీమ్ అమలు చేయాలని నిర్ణయించింది. అర్హులైన ఆటో డ్రైవర్లకు ఒక్కో వాహనంపై గరిష్ఠంగా ₹ 1.50 లక్షల వరకు సబ్సిడీ అందించనున్నారు.
👉 కాలుష్య నియంత్రణే లక్ష్యం !
హైదరాబాద్లో పెరుగుతున్న వాహన కాలుష్యాన్ని నియంత్రించడంతో పాటు ప్రజారవాణాలో స్వచ్ఛమైన ఇంధన వినియోగాన్ని పెంచడమే ఈ పథకం ప్రధాన ఉద్దేశం. ప్రస్తుతం నగరంలో పెట్రోల్, డీజిల్తో నడిచే ఆటోలను దశలవారీగా ఎలక్ట్రిక్ వాహనాలుగా మార్చడం ద్వారా వాయు కాలుష్యాన్ని తగ్గించేందుకు ప్రభుత్వం ప్రయత్నిస్తోంది. కేబినెట్ చర్చల ప్రకారం హైదరాబాద్లో 18,766 పెట్రోల్, డీజిల్ ఆటోలు ఈ కార్యక్రమం పరిధిలోకి వచ్చే అవకాశం ఉంది.
👉 రెండు మార్గాల్లో అవకాశం !
ప్రస్తుత ఆటోను పూర్తిగా తొలగించాల్సిన అవసరం లేకుండా ఎలక్ట్రిక్ కిట్తో రీట్రోఫిట్ చేసుకునే అవకాశం కల్పించనున్నారు. మరోవైపు పాత ఆటోను స్క్రాప్ చేసి కొత్త ఎలక్ట్రిక్ ఆటో కొనుగోలు చేసుకునే అవకాశం కూడా ఉంటుంది. ఈ రెండు విధానాల ద్వారా ఆటో డ్రైవర్లపై కొత్త వాహనం కొనుగోలు భారం కొంతవరకు తగ్గే అవకాశం ఉంది.
👉 ఆటో డ్రైవర్లకు ఊరట !
రోజువారీ జీవనోపాధికి ఆటో రిక్షాలపై ఆధారపడుతున్న డ్రైవర్లకు ఈ పథకం ఆర్థికంగా ఊరటనివ్వడంతో పాటు ఇంధన వ్యయాన్ని తగ్గించే అవకాశం ఉంది. అదే సమయంలో పెట్రోల్, డీజిల్ వినియోగం తగ్గడంతో నగర వాయు నాణ్యత మెరుగుపడే అవకాశముంది.
👉 ‘గ్రీన్ హైదరాబాద్’ వైపు మరో అడుగు !
హైదరాబాద్ను మరింత పచ్చదనం, స్వచ్ఛమైన రవాణా వ్యవస్థతో కూడిన నగరంగా అభివృద్ధి చేయాలన్న ప్రభుత్వ లక్ష్యానికి ఈ నిర్ణయం కీలకంగా మారనుంది. ముఖ్యమంత్రి ఎ. రేవంత్రెడ్డి నేతృత్వంలోని ప్రభుత్వం ఎలక్ట్రిక్ మొబిలిటీని ప్రోత్సహించడం ద్వారా భవిష్యత్ నగర రవాణాను కాలుష్యరహిత దిశగా మళ్లించే ప్రయత్నం చేస్తోంది. పెట్రోల్–డీజిల్ ఆటోల స్థానంలో ఎలక్ట్రిక్ ఆటోలు పెరిగితే.. హైదరాబాద్ ‘గ్రీన్ సిటీ’ లక్ష్యానికి ఈ నిర్ణయం మరింత బలం చేకూర్చే అవకాశం ఉంది.